Áður en þetta grappa er skoðað verður að staldra við og dást aðeins að flöskunni — þær verða ekki mikið flottari og er henni síðan pakkað í eldrauðan kassa. Þetta grappa er um 42% en hefur mjúka, allt að því rjómakennda áferð. Ilmflóran er breið og dæmigerð fyrir grappa en sterkur karmellutónn gefur því sérkenni. Þetta grappa er óeikað, tært og tilvalið í lok máltíðar eða bara hvenær sem andinn kemur yfir mann, glas hér og glas þar (en í hófi alls staðar).