Ólíkt öðrum Valpolicella vínum er þetta framleitt úr þurrkuðum þrúgum og þess vegna líkist meira Amarone í stíl enda kraftabolti hér á ferð með 15% áfengismagn. Það sem skilur helst að er að þær eru látnar þurrkast skemur í þessu vínu heldur en í Amarone víni framleiðandans, í tvo mánuði í stað fjögurra. Það stígur þó létt til jarðar, sýran og bjartir yfirtónar ávaxtarins sjá um það. Þroskað í 36 mánuði í eikartunnum, frönskum og amerískum, og síðan 12 mánuði í flösku áður en það er sett á markað. Eikartónar eru því áberandi á yfirborði ilmsins en undir niðri kraumar samþjappaður kjarni sem einkennist helst af sætum kirsuberjum. Í munni leynir vönduð víngerðin sér ekki því vínið er flauelsmjúkt með mikilli fyllingu. Það er alll þurrt þrátt fyrir sætan kjarnann og endar á steinefnaríku eftirbragði sem minnir á byssupúður. Keimur af sætum berjum lifir í munni endalaust að því er virðist. Nútímalegt vín sem hefur engu að síður sterk upprunaeinkenni sem eru óneitanlega Valpolicella-leg þrátt fyrir sérstöðu vínsins.