Grand Cru vínekrurnar í Chablis eru tilkomumikili sjón. Þær eru alveg ofan í bænum og mynda eina samfellda hlíð. Þar á meðal er Vaudesir vínekran en vínið er eingöngu framleitt úr Chardonnay þrúgum af þeirri vínekru. Þegar komið er með þrúgurnar í hús að hausti fer fram vandleg skoðun á færibandi og allar skemmdar þrúgur vinsaðar frá áður en þeim er hellt í vínpressuna sem skilur frá hrat og stilka. Þegar gerjun er búin í stáltönkum fer vínið í eikartunnur þar sem það dvelur í fjóra mánuði. Til að stilla eikaráhrifum í hóf eru eingöngu 10% tunnanna nýjar en restin allt að þriggja ára. Niðurstaðan er mjög elegant vín, þétt með áberandi steinefnum og laufléttum, ristuðum eikarblæ.